Plantun de Prouvènço

Pèr coumpara dos planto d'encò nostre

Scutellaria alpina & Pinguicula vulgaris

Scutellaria alpina

Lamiaceae Labiaceae

Noms en français : Scutellaire des Alpes, Toque des Alpes.

Descripcioun :
L'escudello-dis-Aup trachis en mountagno ounte pòu curbi de bèu relarg sus lis esboudèu o li pelouso cauquiero. Emé si flour à casco vióuleto, bluio e blanco, si bratèio en escaumo e si fueio óupousado longo de 18 à 25 mm, i'a pas trop pèr s'engana.

Usanço :
Sèmblo que, coume l'escudello, siegue uno planto febrifujo.

Port : Erbo
Taio : 5 à 30 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Scutellaria
Famiho : Lamiaceae
Famiho classico : Labiaceae

Coulour de la flour : Bluio
Petalo : irreguliero
Ø (o loungour) flour : 2,3 à 2,5 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Jun à avoust

Liò : Pelouso - Esboudèu
Estànci : Subremediterran à Aupen
Couroulougi : Ouroufito-Éurasiatico
Ref. sc. : Scutellaria alpina L., 1753

Erbo-grasso

Pinguicula vulgaris

Lentibulariaceae

Noms en français : Grassette commune, Langue-d'oie.

Descripcioun :
L'erbo-grasso trachis en mountagno, sus cauquié, dins li riéusset e àutri relarg bagna. Es uno planto carnivoro que pòu aganta de bestiouno emé si fueio pegouso à bord envertouia. Se destrìo de si cousino, mens coumuno, que si flour soun plato emé uno taco blanco sus li petalo que li bord soun pas gaire net.

Usanço :
Li fueio soun couneigudo pèr caia lou la, parié qu'en Suèdo se n'en servien. S'adoubo un sirop purgatiéu que sèrt peréu pèr gari contro lis escarto de pèu. Aro s'atrobo en fitouterapìo pèr sougna lou tussi (espetouranto), li mau de garganto e apasima li nèrvi. S'adoubo en tisano, 20 g de fueio emé de mèu e de jus de limoun. Pamens la planto èi proutejido dins d'ùni relarg.